Sie, ganz ehrlich, ich will heut`mit Ehna ganz sicher net`s „Hugole treiba“. Gwieß net! Ich däd Ehna aber gern erkläre, was des mit am Hugole uff sich hat. Ond außerdem verrat ich Ehna ao no, wia Se mit ma ganz neumodischa Hugo dean Sommer no bis übern Herbscht naus ganz locker verlängera könnet.

Älles was Sie brauchet hen Sie bestimmt em Keller – oder sie könnet`s kaufa! Also, bleiba mer doch z`erscht beim Hugole. Wenn mer mit ebber s`Hugole treibt, dann hoißt des, dass mer dr andere so gar net für ernscht nemmt – also für bleed verkauft. Wenn Se also oin so richtich reiglegt oder ehn schickaniert hen, dann isch der halt`s Hugole (fascht wia dr Hannes beim Bürgermoischter).
Dr Hugo den ich Ehna aber heut empfehla will, der hat an ganz andres Kaliber: sau-kalt, sau-lecker! Sie kennet ja älle „Aperol Schbrizz“ – x-Sommer lang probiert. Seit es dean Aperol bei älle Fäscht sogar bei de Landfraua gibt (nix gega Landfraua, dia sen schwäbische Ober-Oberliga ond i ben oberschter Fän äller Landfrauen!), hat mol was Neues komma müssa.
Jedzd also Hugo: Sekt, Prosseko oder Weißwei`, dazu Holonderblüta-Sirup ond ganz viel Eiswürfl. Des i-Tüfele, ganz wichtich, send Pfefferminzblättle, ohne dia goht`s uff koin Fall! Mischet Se des ganz nach Gschmack. Wenn Se scho vorher uff Zack waret, hen Se em Frühjohr Ihrn eigena Holonderblüta-Sirup gmacht (wenn net, dann verrat i Ehna des Rezept rechtzeitig em nägschta Johr). Ansonschta müsset Se den halt kaufa – aber bitte beschte Qualität, sonscht wird`s nix!
So, jetzt hen Se an Hugo. Wenn`s net klappt oder wenn Se no Froga hen, na schreibet Se mir halt über dean Blog. Aber bitte störet Se mich net am Abend – do sitzet mir nämlich uff dr Terrass` ond trinket Hugo!

Herzlichscht,
Ihr Plaudertäschle