Sie, sage Se mol, merket Sie des au? Seit Tagen han’ i so a Pritzla en dr Nas. Noi, des isch net bloß mei Heuschnupfa. Dean han i wega de Birka scho seit Januar. Noi, des isch was anderes. Ja, er isch’s! Ja, dr Frühleng! Endlich! Wobei: Bei mir mischt sich en äll die Frühlengsgefühle au emmer bissle Trauer. Ade mei Ofabänkle, ade ihr Berge von Bücher. Jetzt han’ i koi Zeit mehr für euch. Ich muss naus, uff d’Gass’, schaff’em Garta ond mach uff Freizeit.

Könnet Se sich erinnera – an mein liabschta Tag em Herbscht. Es regnet. Dr Sommer isch vorbei ond i lass´am Sonntich dr Rollada ganz zu und läs dr ganze Tag. Bergeweis han i Bücher g`läse dr Winter über – de Schdadtbüchereia en Fellbach ond Waiblenge sei Dank. Weil, so viel Bücher, wie i läsa kann, kann i gar net kaufa. Mein Mo sagt emmer, i dät Bücher fressa – ond er bezweifelt, dass da henterher no Buchstaba dren sen. Ja, es isch net oifach mit oiner, die emmer bloß henter ma Buch vorschwätzt. Er hält`s aber aus (ich ehn aber au)!
Vorbei. Noi, net mit meim Mo, sondern mit d`r Zeit für Bücher. Frühleng! Hen Sie scho mol uff dr Terrasse a Buch gläsa? D`Sonn scheint dr direkt ens Gsicht oder ens Buch – Du kannsch de zwischa Lesebrill (ja, ja, mer kommt halt ens Alter) ond dr Sonnabrill net entscheida. So isch des ja gar nix. Da gang i lieber doch en dr Garta ond schaff a bissle.
Des blaue Band vom Mörike flattert dabei om mich rom – ond am Ende von deam Band seh`i Berge von Bücher, a Ofabänkle, dr Herbscht. Noi! Halt! Stopp!
Gucket Se jetzt de Blümla em Garta zu, genießet Se laue Lüftle onds Vogelgezwitscher am Morga. Freuet Se sich mit mir über dr Frühleng ond legtet Se sich a Lischte mit Bücher für dr Herbscht an.

Für Läsetipps ben ich Ehna jederzeit dankbar!

Herzlichscht,
Ihr Plaudertäschle

Sie, saget Se mol – goht`s Ehna grad so wie mir:
s´wird Weihnachta, jetzt scho?

Meine Oliva-Bäumle standet no draußa, Zitrone au, ond scho hen mer des erschte Kerzle am Adventskranz anzündet. Ganz ehrlich, i ben no gar net en Weihnachtsstimmong, aber i feier ja ao Weihnachta en Rom.

Sie, jetzt muss i Ehna erscht mol an Geheimniss verrata: ihr Plaudertäschle wohnt en Rom. Jaja, i woiß, was Sie jetzt denket – klar, Italja, wega deane Oliva- ond Zitronabäumle. Von wäga: Rom (…-sonschtnowas) em Remstal isch`s. I fühl mich dort aber grad so wia en Italja! Weil ja älle saget, des Remstal sei di Toskana Deutschlands. Haja, so fühlt sich des ja ao an. Fraget Se meine Zitronabäumla!
Aber zrück zo Weihnachta: Räumet Se Ihre Bäumle bloß net en dr Keller, stimmet Se sich trotzdem uff Weihnachta ein. Machet Se Wunschzettel, ganget Se uff Weihnachtsmärkt, kaufet Se Geschenkle (zom Beischbiel bei dr Heike Marx ond Kultissima) ond schmücket Se nebabei Ihre Oliva-, Zitrona- ond Orangscha-Bäumle mit Lichterketta ond ällam Brimbamborium.
Vor allem aber: Lehnet Se sich zrück, betrachtet Se Ihre Bäumle, denket Se ans vergangene onds neue Johr, sinniered Se über Weihnachta ond wega mir ao über dr Sinn vom Leba.
Aber machet Se mir doch oin Gfalla: Kommet Se runter im Advent, feiret Se scheene Weihnachta – ond kommet Se guat ens nägschte Johr.

I wünsch` Ehna frohe Weihnachta ond des Beschte fürs neue Johr!

Herzlichscht,
Ihr Plaudertäschle